KA NU TAWNGTAINA

    "Khawvel hausakna leh sannate,

      Khawvel ropuina Chunnu’n min hlan lo mah sela;

      Min tawngtai sak thin, min dil sak fo thin;  
     A hraileng tan malsawmna tinreng min hlan thin".                                                            

 

                Khuavel hrut chhuak ila, awm thei reng hian ka ring nemaw chunnu hmangaihna tluka hlu leh ropui hi! Finna leh thiamna hmanga chhuichhuah zawh rual loh a hraileng tana a nunna hial hlan ngamtu Chunnu huaisenna, a hraileng kawng a bo loh nana Lalpa hmaa tawngtaia a dinpui thinna zawng zawngte vang hian, “mi ropuite chherchhuaktu” tiin sak hming thar ka hlan a che.

               Khawvel eng ka lo hmuh ve theih nan thla tam tak hrehawm tinreng tuarin mi lo pai a, ka lo pian chhuahin thisen tam tak i hloh tih reng kei chuan ka lo hre si lo. Chauvin, hah thin hle mah la, i hmangaihna chuan min kuah tlatin, hringnun hi tahnain bul tan mah ila, zaidam takin nuihdan mi zirtir thin. Ka riltam hlauin hnute tuiin min chawm a, kal dan ka thiam lohin kal dan mi zirtir bawk a. Zanah ka thangharha a hraileng thlaphang taka ka tah hlauh vangin zan mu chhing lovin mi lo chawi tlei var thin. Ka lo seilen huna nun kawng ka bo loh nan, “Isua chan chin” min hrilhin nundan mawi leh thu tha tinreng min fah thin zawng zawngte vang khan tuna ka dam chhan leh ka kawng zawh hi mi lo sial sak a ni  ka ti lo thei lo.   

        

              Rual ka ban ve nan zirna run sang min kai tirin nitin zirna runah min thlahin ban hun pawhin min hmuah a tlai ngai lo. Mite karah riltama ka beihvaih hlauvin zing khaw var leh var lo pawh sawi lovin khawvawt tak karah ei tur min buatsaih sak lai khan kei chu khumah tui takin ka muhil si a. Ka thangharh loh nan thawm dim tak chungin a hraileng ka hmakhua tur dawnin, beiseina sang tak nen zirnaa ka chakkhai tur tinreng min ngaihtuah sakin, tah leh nuih bak ka thiam hma atang rengin a hraileng eitur tha tha min peiin, vawi tam tak  chaw a nghei thung a. Beiseina sang taka min thlir vangin a beisei dan loh ang taka ka nunin ka tan kawng tha lo a ni tih min hrilh chung zelin min zilhhauin hmangaih vangin min vaw thin.       

    

             Chung zawng zawngte chu ka tan a tawk hle tawh nain a hraileng tan a hmangaihna tawp ngai lo  chuan thil ropui tak min la hlan cheu maw! He lei kan dam chhung nite hi hlobet par ang lek a ni tih hriain, thlafam changa pial lei thuahriat hnuaia a zal hnu pawha nun kawng min hruaitu atana mi lo thlan sak chuai ve lo tur “Chatuan nun kawng” min zirtirin min tawngtai sak thin.            Iang zo awm hian ka ring mawlh lo Chunnu’n a hraileng tana duhsakna tinreng a hlan tluka hlu leh ropui hi! Mi tu emaw chuan a thian tan thil ei tur a pe mai thei e, mahse mahni ei tur nei lo khawpa pe thei erawh an awm meuh lo Chunnu chauh lo chu! Hmangaihtu hmangaihna chu ahmangaih-a te tana thil a tih sakah a lang chiang thin si a.           

             Tunah tuan tul vangin mual dang belin tawn ngai loh leh la rah ngai loh ramah cheng mah ila, Chunnu hmangaihna chuan englai mahin min thlahthlam ngai lo tih ka hria. Biakfung chawia ngaih thu inhlanin, sakhmel darang tawn ni her chhuak rih lo mahse, “Ka nu tawngtaina” chuan englaimahin min kian san ngai lo tih ka hriatin ka thla a muang hle thin. Kei zawng hei hi ka lo hre ta, sual kawng ka zawh loh nan leh kawng ka bo hun pawha nun pangngaia ka nun leh theih nan Ka nu’n min lo tawngtai sak reng thin tih hi. Tuna ka dawn van malsawmna leh lei malsawmna zawng zawngte pawh hi “Ka nu tawngtaina” rah a lo ni.@@