Danglamna

        Danglamna tel lova Ringtu nih hi thil hlauhawm tak a ni a, chung mite vang vek chuan Kristian hming hi tihchhiatina awm thin.Kan ngaithla a, kan sawi a, kan nun erawh tih danglamin a awm si lo.Danglam tura koh kan nihah chiang hle mah ila, danglam turin kalsan ngaite kan kalsan phal lo va, khawvel hmangaihna hian min la hneh thin em vang a ni.
        Ringtu nun chu danglamnaah hian a chiang chauh thin a.Danglam ngam lo ringtu nih hi ringtu khawngaih thlak, Pathian mi hman tak an ni ngai lo va, Pathian thute hi tha tak sawi ve thin mahse an nun chuan a phurchhuak zo tlat loh vangin midangte tan malsawmna a thlen thei thin lo.Thu kan sawi reng reng hi a hmun azira hlawhtling a ni lo va, a hun a zira hlawhtling pawh a ni ngai hek lo.Thlarau thianghlim puihna vanga mite tan thlum ve thin chauh mai a nih vangin, chu Thlarau Thianghlim puihna bawk lo chuan engmah kan ni si lo va.Lal Isua ngei pawh kha thlalerah ni 40 teh meuh mai thlemin a awm a, mahse chungte chu a paltlang hnuin Lalpa thlarauin chakna rawn pe tih kan hmu a ni.Puihna chu englai pawha mamawh thin i nih vangin puitu puih theih tura i nun i hman ve chu a tul thung.
        Krista tana danglam ngam hi puihna dawng lo an awm ngai lo.Thihnaah luta nung turin min duhna tak hi  Pathian thu ril zia leh rinna pawimawh zia tilang tu pawh a ni a.Lalpa tana kan danglam ngamnaah hian Lalpa mi hman chu kan ni chauh thin.Chutiang tel lo chaun rawng hi a bawl theih a, thu pawh a sawi ve teuh theih tho nain, mite tan damna chu a thlen thin si lo.Midangte nun thlakthlenga, an damna tak thlentu nun zawk chu danglam ngamnaah hian a awm thung.###

Pathian kohna

Tun lai khawvel changkang tawh tak mai vang hian khawvel hi a nghing mek a, Lal Isua lo kal hun ni telin a hnai tih chu hmasang ata tawh an sawi cham chi ber a ni thin.Mahse tun thleng hian engvange a lo la kal loh le, a tlansate chuan kan nghakhlel hle si a, vawi tam tak kan au va, kei ngei pawh hian ka au ve thin, "Lalpa lo kal tawh mai rawh"tiin. Mahse tun thleng hian a lo la kal si lo. khawvelah hian Kristiante chu 2200 million kan ni a, mahse Pathian chuan tawk a la ti lo, sakhaw dang biate hremhmun kal tur an nih bakah, kan kristian ngeiah pawh hian tam tak an awm vangin a la zahngai rih mai chauh a ni. A hnuaiah hian chiang zawkin kan hmu thei ang : ------

Religion	Adherents	percents
Christianity	2200 million[4]	31.50%
Islam	1600 million[5]	22.32%
Secular[a]/Nonreligious[b]/Agnostic/Atheist	≤1100 million	15.35%
Hinduism	1000 million	13.95%
Chinese traditional religion[c]	394 million	5.50%
Buddhism	376 million	5.25%
Ethnic religions excluding some in separate categories	300 million	4.19%
African traditional religions	100 million	1.40%
Sikhism	23 million	0.32%
Juche[d]	19 million	0.27%
Spiritism	15 million	0.21%
Judaism	14 million	0.20%
Bahá'í	7.0 million	0.10%
Jainism	4.2 million	0.06%
Shinto	4.0 million	0.06%
Cao Dai	4.0 million	0.06%
Zoroastrianism	2.6 million	0.04%
Tenrikyo	2.0 million	0.03%
Neo-Paganism	1.0 million	0.01%
Unitarian Universalism	0.8 million	0.01%
Rastafarianism	0.6 million	0.01%
total	7167 million	100%

Mi tam tak van ram chu ka kai ngei dawn a ni tih chiang hle mahse, mi zawng2 Lalpa hmaah chuan angkhat vek kan ni a, min hmangaih vek bawk vang hian chance min la pe rih a ni. Piangthar tawh ten a thu puang darh a, piangthar lo ten an ngaihvena nun tam an lo neih zawk nan, Pathian chuan Extra time min la pe mai chauh a ni si a, chu chu hrethiam a, tih tur kan neih chhun chu ti a, min tirna hmunah chuan kal a, min kohna hmunah chuan rinawm taka thawka bei zel turin min duh a ni.

Ram thimah kal turin kohna i dawng kher lo a ni mai thei, mahse chuvang ringawt chuan rawng bawl tur ka ni ve lo i ti thei lovang.Min dahna hmun hi a awm theuh a, mi tam takin an inhriat laiin mi tam tak chuan ngaihsak lem loh vangin min ko lo kan ti tlawng mai thin. Hei hi a pawi em em a, Pathian thu nung nei si lo va, kan naupan tet ata kan lo hriat thin vang mai hian kan in la kristian vak vak mai a, mahse rah chhuah thei turin chakna kan neih thin loh vang hian kristian hmel ti chhe  tu mai kan lo chang leh thin.

Lalpa chuan a rawngbawl tur a nih loh vek pawhin piangthar turin a ko che. chu vang chauh chu a ni, damna a la pek chhan che ni.Thil dang a awm lo, Pathian hian tawk a tih hun chuan khawvel hi sawichhiatin a awm dawn a, chu hunah chuan khawngaihna leh zahngaihna hun a awm tawh dawn loh vangin, tunah hian zah a la ngai rih a ni.He khawngaihna hun hi extra chauh a ni kan tih tawh kha, a rei dawn lo va dawngdah leh duh duha hun hmanna hun a ni tawh lo.

Mi zawng zawng hi missionary kal vek ta ila tunge inlama mite lo enkawl ta ang, kal dan thiam lovin kawng an lo bo vek thei si a, Mi zawng zawng hi Evan chhuak vek sela, tunge Pastor tawh ta ang? ka sawi tum chu a chiagn tawh hlein ka hria, Lalpan min dahna hmun a nei a, chu hmunah chuan rinawma a rawngbawl turin min duh a ni.A kohna i dawng a nih chuan pensan suh ang che, pensan mah la, a zawng chhuak tho tho dawn che a, khawiah mah i tlanbo thei dawn si lo.Lalpa chu en zawk la, Lalpa ram tan tiin bei zawk ang che, i mamawh tlak chham tireng hretu chu amah chu ani a, hlau suh la, zam hek suh ang che. Khawiah pawh i awmna piagnah awmpui tur chein i kiang a ding zel ang,,Lalpan a tharin malsawm zel che rawh se ####

Thi tura inpea nung turin

               Daniela 3:8-30 Kan en chuan Daniela thian pathum Sadraka , Mesaka, Abednagoate thiandun chuan Lal  Nebukadnezzara milim hmaah an kun ve duh loh vangin, meipuiah paihthlak an ni a.Mahse an biak Pathian tana an rinawm vangin, Pathian chu a mah ringtute tan a rinawm a, a tlai ngai loh zia chu chu meipuiah ngei chuan a rawn ti lang ta a ni. Amaha rinna nghat leh a tana rinawmte hnenah chuan a ropui zia leh a thiltihtheih zia a hmuh tir thin a ni.

             Harsatna tam tak kan nunah hian a thleng thin.Harsatna hi awm lo se, nuam tih hi a awm thei lovang, harsatna a awm vang hian nuam tih hi a lo chauh a ni si a. Harsatna kan tawh hunah pawh a hnenah tlan lut a, a thiltih mak leh ropui min hmuh tir hi Pathian thiltum a ni .Mi tam tak chuan harsatna hi anchhiaah kan ngai thin a, mahse Pathian chuan kan thinlung luhlul em vang hian kan tana tha tur zawkin ro min rel sak thin a lo ni.

              Lalpa tan kan penchhuah ngam zatin kan tan a thiltih ropui kan hmuh thin. Engkim ti thei chu a ni a, mahse a thiltihtheihna mak leh ropui min hmuh tir nghal hum hum hi a duh dan a ni lo.Thi tura inpea nung turin min duh zawk vang a ni.Lalpa tan thih huama ke kan penin, thihna hnehtu a nih zia min hmuh tir a duh vang a ni thin.Amah vanga thi tura in pe te an thi ngai lova, amah vanga chanten an chan hlen ngai lo va, amah vanga hrehawm tuar ten an tuar hlen ngai hek lo.Pathian thu hi khawvel mite tan chuan atthlak thil a ang ve duh thin khawp mai.Mahse Pathian thu hi fing tak a ni a, amahah chuan awm a, ring turin min duh a ni.

             Lal Isuan mi tam tak a tidam a, a tih damte hnena a sawi thin chu " I rinna hi i dam pui a ni" tih hi a chamchi thin.Tupawh amah ring chu an mualpho lova, chatuana nunna an neih zawk nan tih a ni bawk kha.Lalpan tan kan ring ngam thin loh vang hian kan hmuh tur ang pawh kan hmu thin lo.Lalpa tan in pe la, i tan a awm reng ang.Lalpa tan thi turin i inpek chuan nunna neitu a nih zia i hmu ang.Lalpa tan i neih zawng2 i pek chuan engkim neitu a nih zia i hmu ngei ang.Pathian a tharin malsawm che rawh se..####

Tuarna phena malsawmna

           Pathian hian vawi khat chauh thu sawi se la, khawvel pumpui hi harhna a lo thleng mai tur tiin ka ngaihtuah fo thin.Pathian chuan mi zawng zawng chhandama awmah leh a thu hria a duh a, mahse thu hrilh atthlak tak hmanga chhandam chu tha a ti zawk si.Harhna ropui vawi leh khatah a thleng tir thei lo a ni lo va, harhna chu ropui tak a ni tih kan hriat theih nan, a mite kaltlanga chhandam chu tha a tih vang zawk a ni.

           Ringtu nun hi kawng awlsam a ni lo va, mahse kawng hlauh pawh a ni hek lo. Nuam sa taka ringtu nih hi a nuam a, mahse rah a chhuah thei meuh thin lo.Harsatnaah hian Pathian hmel a lang fiah thin, a chhan chu kan thinlung luhlul em vang a ni.Harsatnaah chauh Lalpa hmuh tum pawh hi thil dik a ni chuang lo va, engkimah hian amahah tlulut thiam ila mi vannei chu kan ni mai a ni.Harsatna chu thleng tur reng a ni a, khawvel kan awm chhung chuan pumpelh theih a ni si lo.Chu harsatna chu engtinge kan pumpelh theih ang tih ni lovin, engtinge kan hmachhawn ang tih zawk hi zawhna pawimawh tak chu a ni.Kan sawi tawh angin heng harsatna chi hrang2te hi a lo thlen hunah pawh harsat lak ata min chhanchhuak theitu kan neih hi hriat fo a tul thin.Chu chu harsat lo awm chhan tak pawh a ni reng si a.Harsa lo ila, Pathian chu kan theihnghilh thuai thin avangin harsaa kan awm hi kan tan a thatna tam tak a awm thin.

           Ringtu nun chu midangte tana malsawmna nih hi a ni a, mahni tana nung tawh lova, kan aia thia tho leh -a tan nung tawh zawk tur kan nihnaah hian, chhel taka a lam en fo tur zawk kan ni.Mite tana i tawngtai sakna chu i tan a ni a, mite tana i thawhna chu i tan a ni, vanah rokhawlkhawmtu kan nihna chu a ni.Ringtu mahni tan chauh ngaihtuah ngawr ngawr thin mi chu a chul/chuai mi thin a, mite tan rimtui pawh a chhuah thei ngai hek lo.Miten kan par rimtui an lo hip theih nan kan rimtui kan chhuah tur a ni a, tawngtaina leh thiltih pawhin midangte tana nun hi kan tih makmawh chu a lo ni si.Chu chu a ni Lal Isuan hmangaihna chung chang a sawi uar em em bawk kha.Hmangaihna chu dan zawng2 zawm famkimna chu a ni si a.

         
Khawiah pawh tuartu awm lovin, malsawm dawngtu a awm theih loh va, kei nin mite tan a ruka kan lo tuar sakna kha an tan malsawmna a ni.Entirnan, kohhranah pawh hian mi zawng zwang hian hlawh a awm si lo tiin hruaitu ka ni peih lo kan tih vek chuan hruaitu tur an awm lo mai ang.Mahse mi pa hnih khat ten an lo tih fan fan vang hian a la ding ve chauh zawk a ni.Tuartu awm lovin engmah hi tih theih a ni si lo.Chu chu a ni ,kan rawngbawlna tura Lalpan min dahna hmun chu mite tana malsawmna ni turin tuarna hian bul a tan a, a tawpna chu hlimna chuai thei lo a ni thung thin.Mite tana kan nung chuan mite pawh kan tan an nung ve ang.###

Nu Mawhphurhna

         Khawvel mi ropuite hian an nute vanga dinhmun sang an nihna hmangain an nute an chawimawi fo thin a, chawimawi an phu reng bawk a.Nute hi an lo va pawimawh em ve! Pate chuan nute ang takin fate an enkawl tak tak hman lo va, ram lamah t

e office lamahte hnathawka an chhuah a ngaih thin vangin.Nute ve thung chu in lam hna thawk an nihnaah hian hun an ngaih bik tihna lam ni lovin, fate enkawl nan hun an hmang tam bik vangin, nute hi an pawimawh bik kan ti lo thei lovang.

        Kei ni zofate hi Kristian zaa za inchhal ve ngat kan ni a, mahse kan in chhal dan erawh kan huaisen tawk lo. Kan mawh lo e, huaisenna kan nei miau si lo a ni.Mi ramah emaw hmun dang hrim hrimah kan awmin kan nun hi arkhuh hawn ang hlauh hian kan zalen nghal mai thin.Chu chu a ni pawi em em thin chu kan Kristianna chu kan ramah hian a awm lo va, kan nuna bet a ni zawk si a.Khawiah pawh awm ila, Kristian hi kan nihna a ni a, a hmun hian a ti danglam thei lo va, a hun hian a ti danglam thei hek lo.

Tichuan, ruihhlo hi kan ti deuh thum a, ringtu leh ringlo pawh angkhatin kan ti tlang hlawm a, entawn tlak reng kan awm lo.Then khat phei chuan sualah pawh kan ngai lo, he ti khawpa sual ni si hian.Lalpa hming hi kan lam mai mai a, kan ka hian kan sawi mai mai thin a, danglamna erawh kan nei si lo.Chu nun nei chung chuan midangte tan malsawmna ni tur chuan min ti danglam pha meuh lo a ni.

            Heng kan sawi tak zawng zawngtehi engvanga thleng nge ni tih chuan, a hmasa berin nu leh pate kan mawhpuh lo thei lo, tette atanga mn lo zirtirtu ber an nih miau vang hian.Nu chuan a fate chu hun bi siam sakin Pathian biak hunte a siam saktur a ni a, Bible chang a byheart tir thin tur a ni.Mahse chutiang chu kan paih thin lova, nu thenkhatte phei chuan kohhranah rawngbawl ngai tiin kan fate kan enkawl hman tawh lo va, mahse kan fate enkawl zawk chu kan tih tur dik tak zawk chu a ni si.Kan mawhphurhna hi han hrechiang theuh teh ila aw, kan ram a dam mai bakah mite tan pawh damna thlentu kan ni ngei dawn si a.

         Pathian thu hi sawi mai mai chuan kan tan tlakranna mai a ni a, kaa fak mai hi Pathian huat zawng ber a ni.I thinlung i rilru i taksa ngeiin i chawimawiin i fak tur a ti si a.Kan thu sawi ai hian kan nun hian mite nun a thlak danglam zawk a, nunin a pu chhuak si lova, kan sawi mai mai thin chuan chu mi atang chuan mite piangthar pawh nise, keimah ni ang bawk kaa sawimai mai thin tho fa kan hring thin. Theipui kungah chuan theipui rah vek an lo thin ang hian kan tuh mek rah chu kan nun hian a hril.

         Nute mawhphurhna chu fate van ram hruai thleng mai leh nun mawi tinreng zirtir a ni a, pawn lama rawngbawl vak vak kha thiltha tak ni siin kan fate thlahthlam nan kan hmang phah thin vangin tih loh mai kha  tha zawk hle ang.Tin, kan rila rah kan fate hi rorelna niah chuan Lalpa hmaah kan la sawipui ngei dawn a ni, Pathian chuan enkawl tura mawhphurhna min pek a ni si a, min la zawt ang a, engvange Ka hnenah i rawn hruai loh tiin chutah chuan engtinnge kan chhan dawn le???

Lal Remruat

            Kan Pathianin a hming min hrilh zinga pakhat chu "Remruattu-a" tih a ni.A ni chu kan tana tha tura kawng engkim ro min rel saktu a ni a, kan dil ang angin rem min ruat sak ngai lo va, kan tana tha lo turte min hnawl sakin, tha tur zawk kawngah erawh min hruai si thin.

           Harsatna chhumpui nasa takin a zinga, hma lam pan dan tur pawh thiam lo khawpin ka buai thin.Lalpa auin min pui rawh tiin beidawng leh chauin kan au thin a,ka nunnate min laksak zawk turin leh dam thlakhlelhna pakhat mah nei tawh lovin kan hunte kan hmang thin. Mahse chu chu Pathian duh dan a ni lo va,a duh dan zawk chu harsatna a lo thlenin a hnena tlan luh dan thiamna min pe zawk thin a ni.Kan retheihnaah hian Lalpa hmel chu a lang chiang zawk thin, ka hausak loh hi ka chapo loh nan a ni si.Lalpa remruatna engah hian tunge hnial thei awm ang?


          A nih chuan fahraha ka awm hi ka tana tha tur em ni? Ni e, ka tan tha tur a sin, Lalpa hmel a lo lang theih nan leh a mahah chawlh dan kan thiam theih engkim kan chunga thlengah hian Lalpa remruat loh reng a awm si lo.A ni chu Remruattu-a a ni si a, kan tan kawng engkimah rem in ruat sak thin a lo ni.Piang sual hian tih sual a nei em ni ? nei lo ve Lalpa ropuina tihlan nan a ni zawk e, piang sual awm lovin piang thate hi, piang tha tih a ni thei dawn si lo.Engkimah hian mihring hian a vui thu thlen tur a nei lo hulhual a, kan chunga thil thlengah hian vui lo va, a hnena lawm thu sawi mai tur zawk hi kan ni e.

         I chunga thil thlengah chuan i lungawi zan lo a ni mai thei e, mahse enge i tih theih chuang? Fian hi chaw hawp nan kan hmang thin a, he fian hi tuiah lo chang rawh i ti thei em ni? Vui nasa hle mahla, awm ze nei lo thilah i buai mai zawk a ni a, i chan tawk i chunga Pathian rorelah chuan lawm la,A ni pawhin a thlamuan zawk dawn che nia.##

Phatsantu ka ni

             Juda Isakriota chuan Lal Isua a hralh a, vawi khat chiah a ni a hralh ni, mahse kei ve thung chuan vawi chhiarsen loh ka lo hralh ta. A thu chu ka au pui ve nasa nain ka nun hian a phur chhuak zo si lo, Khawngaihna ngah tak a ni tih hre reng mah ila, a khawngaihnaah chuan ka chiang si lo, mite chuan mifel tak emaw min ti a, ka chhungril an hmuh loh vang mai chauh a ni si.keima hming that nan Pathian thu hi ka  bel a, mite chawimawi leh fak pawh ka hlawh chhuak reng a, mahse mite nun thlak danglam thei tur khawp nun ka pe chhuak leh thei si loh vang hian Isua hralh tu dik tak chu ka lo ni.

            Ka hun liam ta ka thiltih zawng zawngte kha ka chhui kir a, khati khawp a sual ni siin a fa duh taka min lo pawm mai hi a ropuiin a va hlu em ve! Han tehkhin tur pawh awm hian ka hre lo.Misual dum ber mai ka fa tia min ko mai hi lei ah leh vanah pawh ka lawm hla a ni fo ang.Setana chuan ka hun liam ta ka sualnate hmangin ka tlin loh zia leh ka sual ziate mi hrilh nawn fo a, mahse Lalpa lam ka enin ka ngaidam tawh che mi lo ti si.He ti em a min hmangaihtu Lal dang reng an awm lo.Chatuana nunna ka neih nana hrehawm pawisa lova tuar chhuaktu tan nun pum hlum chu a phu ve hle si a.

            Lalpa chuan hun liam ta te ngai a, koh kir theih tawh lohte hnutiang chhawn a, hma lam thlir turin min duh.Ngil taka enin a mah chauh ring chunga ke pen zel turin min ko a ni.A ni chu beisei tlak leh rin tlak a ni a,rin tlak a nih chian zia chu Krossah khan a ti chiang hle si a.Hmangaiha min zong chhuaktu chu hmangaihna vek i chhang let dawn lawm ni?A nunna hlu tak mai min hlan a, tuna kan nunan chu a nun min hlan chu  a nih si chuan, kan nunna hi kan ta a ni lo va ama ta zawk a lo ni a.Ama nun a nih si chuan ama tana nun chu kan tih makmawh ber a ni dawn lawm ni?Khawvel hian kan mitte min tih del sak a, kan nihna leh chanvote pawh theihnghilh thak khawpin min bual aa a lo ni.Hawh u, phatsantu ata chawimawituah i tang ang u.

Chawl hman kan ni lo

Ram tinah kala a chanchin tha thu puang darh turin mi zawng zawng, mihring tawh phawt chu Patianin min tir a, la hre lo te hnena a thu tlang au pui turin leh mitdel te mit var nan, dam lote dam nan min tir a ni.Pastor ka ni lo, Evan ka ni ve lo tiin chhuan lam reng i nei lo ve, chung mite chu Pathianin a ruat bikte an ni a, ruat loh i nih pawhin chhuan lam tur reng i nei lo, khawngaihna chanchin Tha i lo dawngsawng a, chu chu midangten an hrilh che vang chauha lo dawng sawng i ni tih in hria la, chutiang chuan midangte i hrilh ve lohin engtinge Pathian thu chu an hriat theih ang? Kei nin kan hrilh loh chuan ringlo mite tih turah kan dah dawn em ni? Hnai lo ve kan hmuh leh kan hriatte hi hril la, puang darh zel turin Pathianin min ko a,nitinin min thlir reng thin.Zu bawiha tang te tan zalenna, awhna bawiha tangte tan pawh zalenna, chakna reng nei tawh lote tan beiseina duh awm siam sak turin min tir a ni.

Ka thiam lo, finna ka nei ve si lo i ti a ni maw? Pathian chuan i finna leh thiamnate kha a hmang dawn lo va, chungte chu hmang duh se nang chu a tlang kher lo ang che.Thu hril atthlak tak hmanga a mite chhandam turin min tir zawk a ni.Kan fin kan thiamnate hi Lalpa ram zau nan chuan a hman tlak loh a, hman tlak ber leh hman ber tur zawk chu Pathian thu vek hi a ni.Chu chu i hmang loh tikah i buaina chu a lo intan thin ang.Rawngbawl tur chuan kan base ber tur chu Bible hi a ni a,chu chu ti lo va a tunlai zawnga Pathian thu kan lak tikah mi a kan lo chang thin.

Engtinge Pathian thu chu ka hrilh ve ang? Lalpa chuan chhandama awmah leh a thu hril turah a duh che a, engtik hunah nge a ram tan i thawh ve hun tur tiin nitinin a thlir reng thin che a, nghakhlel em emin beiseina  nen a thlir lai che kawng danga i pen san hian a rilru na a, a hnena kir leh turin leh a ram tan thawk turin a sawm reng thin che.Chu chu mitvarna apek chhan che pawh a ni reng si a.Ringtu Thu sawi ka thiam lo i ti a ni mai thei,Nangin i sawi dawn lo va, a sawitu tur zawk chu Lalpa a ni.Nang chuan sawi mah la, tumah i ti piangthar dawn si lo.Nitina kan awmna hmun hi Lalpan kan rawngbawlna field a min ruat sak a ni.Chu chu hria a, kan nung chang leh awmdan tha lote kalsan a, thianghlimna leh nundan mawi chu parchhuah tir a, krista hmel mite hmuh tir hi kan tih makmawh a ni.Chu chu i rawngbawlna tura a dahna che chu a ni tih hi ring hmiah la, Lalpa i chungah a lawm anga, nang pawh thawveng leh lawmin i awm thei ang.

Pastor leh Evan kan tih angte hi rawngbawltute an ni a, mahse an ni chauh hi rawngbawltu awm chhun an i lo, ringtu tawh phawt chu kan mawhphurhna hi a in chen tlang vek a, mahse kan sawi tawh angin Lalpa min kohna hmunleh hun chu a inang lo mai chauh a ni.Lalpa mithmuhah chuan ang khat vek kan ni.Khawvel ngaiha dinhmun sang zawka rawnbawlte pawh nise, lalpa laka rinawm loh hi a hlauhawm ber a, i rinawm lo a nih chuan mi rinawmte hnenah i hna chu Pathianin a pe mai dawn a ni.Rinawmna hi Pathian lawmzawng tak a ni a, rinawmte chu a chawimawi thin.A chhan chu Pathian chu rinawmna Pathian a nih vang a ni.

Pastor leh Evan te hi va nih tum ringawt chi a ni lo va, Pathian koh loh puia lo va in rawlh hi thil hlauhawm tak a ni.A chhan chu Lalpan a kohte chu hrehawmah pawh an tuar hram hram thin, a kotuah an chiang em vangin.Mahse kohna tel lova, phurna chauh va bawl chuan hrehawm a lo thlenin beidawnna khurah min hnuk lut a, beidawng leh chauin kan rum a, kanhnung tawlh mai thin.Hnungtawlh mi nih hi rawngbawl miah lo aiin a hlauhawm zawk , nun pangngai tak neih theih tawh lohna bul a ni si a.

Engkimah Lalpa rawn chungin zelin a ram tana bei turin Lalpa a dahna hmun cheah chiang la, chu a dahna hmunah che chaun rinawm leh chhel takin thawk ang che.Vanah lawmman tam tak a awm a, chu lawmman chu chhe ve thei lo a ni.Ropui taka hlan i ni ang.Chu lawmman chu thlira rinna ke pen a, a ram tana bei turin lalpan a ko che a, a ruat tawh che a ni.A kohna hmun che chu nang mah leh Pathian inkarah khan a awm a, chu chu chiang phawt la, tichuan rinawmin Lalpa ram lo zau sual thim sawi thiatin lal ram i din zel ang u, chawla awm mai mai hman kan ni si lo, khawngaihna chanchin tha hi hril a, la hre lote hnena puang turin min ko a ni.##

Ka Pa Hmangaihna

           Pu Sangate chhung hi an khua puite pawhin an fakin an chhungkua hi chhungkua hlim thei tak an ni. Hetia han en chuan engmah an hausak bikna, an neih nun biknate hmuh tur awm lem lo mahse, an hlimin an in nel a, an nui leh der der thin.An thenawm khawvengte pawhin an awtin an kianga awm nuam an ti em em thin.

           Pu Sangate nupa hian Fapa pathum leh fanu pathum an nei a, an tlum ber chu Mawitea a ni.Mawitea chu hrisel lo em em a ni a, an chhungkuaa an buaipui deuh ber thin a ni.Sikul an han kal tir ve a, nikhat pawh kai chhuak thei lovin, dam loin zirtirtuten an rawn haw tir fo thin. Pu Mawiate nupa chu an mangangin an thlabar em em thin.Mawitea pawh chu hrisel lo thin viau mahse nitinin a lo seilian ve zel a,an in aimahin damdawiinah  a hun leh nite a hmang tam a, amah ngei pawh he ti em em hrisel lo a ni hi a in haw ve ngawih ngawih thin.

           Pu Sangate chhung chuan lungrualin hna hram tireng mai an thawk a, an thawhrah an sum leh pai hmuh vete lah an fapa naupang ber Mawitea inenkawl nan damdawin lama hman ral atan mai a chang zo ta.An lungngaiin an tap fo a,Lalpa hnena an tawngtaina tam ber pawh a ni.

          Tum khat chu Mawitea dam lo damdawi ina an thutpui mek laiin,Mawitea chuan mittui tla hluam chungin a nu leh pa te lam a lo hawi a, “ Ka nu, Ka pa,ti em ema ka ti mangang thin che u hi pawi ka ti thin khawp mai, keimah vanga in mittui tla te, in lungngaihna zawng zawngte kha ka hria a sin, he natna hi ka duh thlanna chu ni lo mahse, kei hi in tan lungngaihna mai ka ni.Kei hi awm lo ta ila, in lungngaihna chu a kiang ngei dawn si a. Chuvang chuan sum leh pai tam tak seng min enkawl thinna hi duh tawk tawh ru, kei zawng he leia rei taka dam ve tur reng khuanu ruat ka ni lo a ni ang. Ka kal hi in tan a tha a ni, In lungngaihnate lak boin a awm tawh dawn si a” tiin. Mawitea thusawi avang chuan a nu leh pate an tap a, an lung a chhe em em a, a pa chuan ti hian a chhang ta a, “Bawihte ni lul lo ve, khawvelah hian ti reng tur hian i lo piang bik lo sin, i dam hun chu a lo la thleng ngei ang, kan dam leh kan dam tlang anga, kan thih leh kan thi dun tur a ni, i tel lova i nu leh paten hringnun kawng kan zawh tur hi tuna kan lungngaihna ai hian a nasa zawk a sin.Hna kan thawk zel anga kan inenkawl zel bawk anga, i la dam leh mai ang, kan neih rothil zawng zawng pawh ral vek dawn mahse i tan kan hlan zel ang e”,tiin a chhang ta a ni.

            Min zirtir se ka duh chu, Kei ni ho hi Pathian fate kan ni a, kan vai hian a fate vek kan ni. Pathian fate ni siin kan Pa Pathian duh loh zawngte tiin, Kan Pa Pathian rilru kan ti nain, kan ti lungngai fo thin.Mi bawrhsawm tak mai kan ni a, kan nunna hi derdep zia pawh kan Pathian pawhin min hriat sak a, nitina min enkawl, kan tana engmah a neih thil reng a ui ngai lo.Chu chu khawvel tawp thleng pawha ka rulh seng hoh loh tur hmangaihna chu a lo ni.Chak lo em em thin mahila, an fa atang min hnawt bo ngai lo va, kei ni ngei pawhin kan chak loh leh kan sualna te avangin Kan Pathian hmai kan hmu ngam lo va, kan insit a, kan inchhir hle thin. Mahse Pathian chuan min hnar ngai lova, engtiang khawpa sual pawh nise, inchhirte a hnar ngai reng reng lo.A hmangaihna chuan a kuah lum a, nitin mn enkawl a, kan tan a thatzia leh a hmangaihna sang ziate hriaa a hnen a, thinlung kehsawma kan kir leh hun min nghak reng thin.##

Hnehna Vawr Tawp

                                                                      

               Zirtirtu ropui tak   pakhat hian thu ropui tak takte sawiin, thil thleng mek leh lo la thleng tur chena sawi lawk thei khawp hiala thiltithei leh fing a ni a.Engkim a duh ang zawng zawng a nei thei a, awm lo ata pawh awm tir thei khawpa thiltithei a ni. Mahse chutiang taka thiltithei ni siin, mi tam tak huat leh sawichhiat hlawhin a nih lohnaah an puh a, a chhehvel miten an nek chep huai huai lai pawhin vawi khat mah a thiam thu reng a sawi lo thung. Vawi khat tal chu a thiamthu han sawi ta sela hmuhsihna lak ata chhuah zalen mai tur a ni laia a thiam thu a sawi ta miah lo chu a ni zirtirtu ropui a ni leh zelna zawk chu ni!Hruihrualin a hnungzangah vawi tam tak vaw mahse a thiamthu sawi nan a ka reng a ang hoh si lo, chhan tha tak chu a awm ngei ang le! Hun a lo kal zela chu zirtirtu ropui tak chu sualna nei si lovin, thing anchhedawngah chuan an khengbeta, chu kraws lerah ngei chuan “a kin ta” tiin hnehna thu a puang ta thung zawk a ni. Hnehna thu chu puang mahse, a chanchin han chhui hian a hnehna reng kan hmu mai si lo. Saltangte chhuah zalenna thu leh boral fate chatuan nun kawng hawnsakna hnehna thu puang mahse, hei hi engtia hnehna thu lo ni thei ta nge ni le?

               Boxing champion tam tak an awm tawh thin a, mahse dam chhunga champion erawh an la awm lo. Tun kumah champion mahse, a aia chak zawk thangthar chuan a champion-na chu a lak sak thuai thin. Henhna chi khat chu ni ve mahse, kum leh khuaa sawi vul tur engmah hnutchhiah a awm lo. Ram pahnih hi an in do reng thin a, tum khat chu ram pakhat zawk chuan a hneh ta a, hnehna hla do sain an lawm ngei bawk a, mahse tlawm ta zawkte chu kum leh khuain an tlawm reng dawn tihna a ni lo, ni khat khatah chuan an la rawn cho leh dawn ang hian, an hnehna chu eng hnehna nge ni tih a chiang thei awm e.

                 Lal Isuan khawvel hneha a ngam dan hi ngun takin han thlir dawn ila, ral khat atang chuan Lei leh van Lalber mai ranin tlawma lo piang a, fam a chang nan thing anchhedawng a thlang ta mai hi a mak em a ni. Chu chauh a ni lo, mite vuak leh hnaisak , thing anchhe dawnga an khengbeh ngei khan “khawvel hnehna thu” min puang sak hlauh mai hi a makna ti zualtu ber pawh  a ni reng a. Mahse maw, Lal Isua hnehna hian damchhung leh thih hnu piah lam, chatuan thleng a daih thung. Hei ngei hi a lo ni hnehna dik leh tluantling chu!

               Lal Isuan khawvel a hneh dan anga ram tinah kala hnehna thu tlang au pui turin min duh a. Chu miah chuan a ni, ringlote pawhin Krista hnuizuitute kan nih min hriat dawn ni! Mi tam tak chuan mi dangte hnuaichhiaha hneh kan tum fo thin, hnehna chi khat chu a ni ve reng a, mahse hnuaichhiahna  hmanga kan hneh tak chuan ni khat ni niah chuan min la hnuaichhiah ve hun a lo la thleng ngei dawn a ni. Hausate an hausa reng lo va, retheite an rethei reng ngai lo tih kan hre si a. Mi hausa pa chuan a kut hnuaiah chhiahhlawh tam tak a nei a, mahse chung a chhiahhlawhte chu a chhiahhlawh an ni kumkhua dawn lo, khua reiah chu mi hausa pa ang bawk chu an la rawn ni dawn si a. Chutih hunah chuan mi hausa pa chuan duh duhnaah tir dawn mahse a tir kal thei ngai dawn tawh lo ang hi a ni.

                Mi tam tak chuan thiltihtheihna hmangin emaw, chakna hmangin emaw mite hneh kan tum thin a, a chang chuan kan hneh ngei bawk a, mahse kumkhua daih reng an awm ngai meuh lo. Hnehna dik tak leh tluantling hmanga mite hneh i duh chuan Lal Isuan khawvel a hneh dan ang hian hneh la, englai mahin i mi hneh tak-a chuan a umpha ngai lo ang che. Midangte hneh nana tha ber chu , Inngaihtlawmna, thatna,hmangaihnate hi an ni. Tu chungah pawh heng hnehna kan han sawi takte hmanga i hneh phawt chuan, i mi hneh tak chuan i lo tar hun pawhin a hmusitin a hnuaichhiah ngai lo ang che. Chu mai a la ni lo, thihna thlanthima i zal hnu pawhin i hming chu a thinlung phekah ziak a ni tlat tawh ang a, a la zah hliah hliah tho ang che. Hei ngei hi a ni Lal Isuan khawvel a hneh dan leh hnehna zawnga ropui ber chu ni! He hnehna hmanga mite i hneh phawt chuan engtikah mah i hnehna chu lak sak i ni ngai lovang. Hei ngei hi “ Hnehna vawr tawp” a lo ni.###

KA NU TAWNGTAINA

    "Khawvel hausakna leh sannate,

      Khawvel ropuina Chunnu’n min hlan lo mah sela;

      Min tawngtai sak thin, min dil sak fo thin;  
     A hraileng tan malsawmna tinreng min hlan thin".                                                            

 

                Khuavel hrut chhuak ila, awm thei reng hian ka ring nemaw chunnu hmangaihna tluka hlu leh ropui hi! Finna leh thiamna hmanga chhuichhuah zawh rual loh a hraileng tana a nunna hial hlan ngamtu Chunnu huaisenna, a hraileng kawng a bo loh nana Lalpa hmaa tawngtaia a dinpui thinna zawng zawngte vang hian, “mi ropuite chherchhuaktu” tiin sak hming thar ka hlan a che.

               Khawvel eng ka lo hmuh ve theih nan thla tam tak hrehawm tinreng tuarin mi lo pai a, ka lo pian chhuahin thisen tam tak i hloh tih reng kei chuan ka lo hre si lo. Chauvin, hah thin hle mah la, i hmangaihna chuan min kuah tlatin, hringnun hi tahnain bul tan mah ila, zaidam takin nuihdan mi zirtir thin. Ka riltam hlauin hnute tuiin min chawm a, kal dan ka thiam lohin kal dan mi zirtir bawk a. Zanah ka thangharha a hraileng thlaphang taka ka tah hlauh vangin zan mu chhing lovin mi lo chawi tlei var thin. Ka lo seilen huna nun kawng ka bo loh nan, “Isua chan chin” min hrilhin nundan mawi leh thu tha tinreng min fah thin zawng zawngte vang khan tuna ka dam chhan leh ka kawng zawh hi mi lo sial sak a ni  ka ti lo thei lo.   

        

              Rual ka ban ve nan zirna run sang min kai tirin nitin zirna runah min thlahin ban hun pawhin min hmuah a tlai ngai lo. Mite karah riltama ka beihvaih hlauvin zing khaw var leh var lo pawh sawi lovin khawvawt tak karah ei tur min buatsaih sak lai khan kei chu khumah tui takin ka muhil si a. Ka thangharh loh nan thawm dim tak chungin a hraileng ka hmakhua tur dawnin, beiseina sang tak nen zirnaa ka chakkhai tur tinreng min ngaihtuah sakin, tah leh nuih bak ka thiam hma atang rengin a hraileng eitur tha tha min peiin, vawi tam tak  chaw a nghei thung a. Beiseina sang taka min thlir vangin a beisei dan loh ang taka ka nunin ka tan kawng tha lo a ni tih min hrilh chung zelin min zilhhauin hmangaih vangin min vaw thin.       

    

             Chung zawng zawngte chu ka tan a tawk hle tawh nain a hraileng tan a hmangaihna tawp ngai lo  chuan thil ropui tak min la hlan cheu maw! He lei kan dam chhung nite hi hlobet par ang lek a ni tih hriain, thlafam changa pial lei thuahriat hnuaia a zal hnu pawha nun kawng min hruaitu atana mi lo thlan sak chuai ve lo tur “Chatuan nun kawng” min zirtirin min tawngtai sak thin.            Iang zo awm hian ka ring mawlh lo Chunnu’n a hraileng tana duhsakna tinreng a hlan tluka hlu leh ropui hi! Mi tu emaw chuan a thian tan thil ei tur a pe mai thei e, mahse mahni ei tur nei lo khawpa pe thei erawh an awm meuh lo Chunnu chauh lo chu! Hmangaihtu hmangaihna chu ahmangaih-a te tana thil a tih sakah a lang chiang thin si a.           

             Tunah tuan tul vangin mual dang belin tawn ngai loh leh la rah ngai loh ramah cheng mah ila, Chunnu hmangaihna chuan englai mahin min thlahthlam ngai lo tih ka hria. Biakfung chawia ngaih thu inhlanin, sakhmel darang tawn ni her chhuak rih lo mahse, “Ka nu tawngtaina” chuan englaimahin min kian san ngai lo tih ka hriatin ka thla a muang hle thin. Kei zawng hei hi ka lo hre ta, sual kawng ka zawh loh nan leh kawng ka bo hun pawha nun pangngaia ka nun leh theih nan Ka nu’n min lo tawngtai sak reng thin tih hi. Tuna ka dawn van malsawmna leh lei malsawmna zawng zawngte pawh hi “Ka nu tawngtaina” rah a lo ni.@@

Rohlu ber inpum khatna

 “Laikhum zala dawnin,

  Ka nghakhlel thin;

  Suihlung ruala Lal ram tan kan beih hun tur”

           Kan chenna khawvel zu rui ang maia a kal thin dan theihnghilh mek a vang leh hun bi nei lek  lo va indona a hmachhawn reng thin vang hian, mi tam tak nun a ti thlabar a, mi tam tak nun beidawnna ruamah hruai luhin an awm mek bawk. Engtianga nasa pawhin indona thli chu lo hrang mahse, invenna kan neih azirin hneha kan awm leh awm loh tur chu a hril dawn a ni. Thing tha chu a zung thuk taka a kaih vangin thlipui nasa tak pawhin a tudawl ngai lo va, a hnena kal thin mi tam takte tan chawlhna daihlim nuam tak pek englaimahin a thulh ngai lo. Chutiang chuan inpumkhatna hi thil tha berte zingah tha ber a ni a, mahse a zung thuk taka a kaih loh chuan an zing atanga helna lo chhuakin amah ngei pawh a ti tlu thin.

           Tute pawh han in zawt ila inpumkhat chu kan duhin tha kan ti hle ang.Mahse hma han la a, beihpui thlaka inpumkhatna lam han thlur peih kan awm leh meuh thin loh vang hian thil ropui tak kan ti thei ngai thin lo.A changin mi tam tak hnen atang vona emaw zilhna kan tawngin, kan tum leh kan rilrua lian ber thilte ti ngam lo hian kan zuihral leh mai thin.Zau zawkin han chhui ta ila, khawvel mi ropui kan tihte hian an vision neih ti hlawhtling tura an beih mek lai hian harsatna na men lo tak an tawk ve a sin.Mahse chuvang mai chuan an thiltih lai an tawp san ngai lo va, an beihngawrh zawk zawk thin vang chauha mi ropui lo ni ta an ni zawk a ni.

           Inpumkhatna hi tha ti viau mah ila, a chunga kan tarlan tak ang khian kan inpumkhat dan a fuh loh chuan thlipui nasa tak kan do zo thin lo.A nih chuan inpumkhatna atana tha ber chu eng hi nge ni ta ang?Engtinnge kan inpumkhat theih ang tih lamte han chhui zui tum ta ila. Sum leh pai atanga kan inpumkhatna chu sum vang vekin kan in then leh thin avangin sum leh pai hi inpumkhat nan chuan a tlak loh tih kha lo hre hmasa phawt ila, sum kan mamawh lo tih lam kan sawi lova, sum hi thupui ber a ni lo tih zawk a ni kan sawi tum chu.

          Tirhkohte thiltihah kan chhiar chuan ringtu hmasate chuan Thlarau Thianghlim a lo thlen atangin Temple ah an inhmu khawm thin a, a neih thilte hmun khatah dahin an ei/in za ho thin tih kan hmu thei ang.Chutiang kher chu tun lai hunah hian a rem tawh kher lo pawh a ni thei e, amah erawh chu tih theih loh em em chu a ni lo thung.Mizo kan ni a, mizo kan nihna ngawt hian kan inpumkhat zo tawh lo a nih chuan mizo nih hi inpumkhatna atan a tlak loh thuah chuan kan chiang thawkhat thei awm e.

           Inpumkhatna hi hmangaihna atanga lo awm a nih angin kan in hmangaih tawn loh chuan inpumkhat hi a theih loh hulhual.Mahni mihring puite hmangaih hi thil harsa luaah kan ngai thin a, Pathian puihna atang chuan thil awlsamte a ni.Mihringte hian hmangaihna dik tak kan nei lo.Kan hmangaih kan tih ve te hi a chhan leh vang vel zel vang a ni zawk.Kan hmangaih chhan ber a ral hunin kan hmangaih leh tawh lo mai thin.Chuvang chuan mihring hmangaihna kan tih hi chu inpumkhat nan chuan a tlak loh tih kan lo hre leh ta.

           A tawp ber atan chuan inpumkhatna chu Pathian thu hi a ni a,Pathian chu a thuah a awm a, thu chu Pathian a ni.Pathian hmangaihna lo chu hmangaihna reng reng kan nei lo va, a tlukpuia hlu leh ropui reng reng a awm lo bawk.Inpumkhatna chu Pathian thu a ni tih hi vawi za pawh ziakin au chhuak mah ila, awmzia a nei meuhin a rinawm lo.Hma kan lak dan tur atana tha ber zawk chu Mizote hi inpumkhat kan duh tak tak a nih chuan Mizo zawng zawngte hnenah Chanchin Tha hril la,mitinte Lalpaah kan lawm tlang dial dial chuan inpumkhat tura au vak vak a ngai tawh lo va, kan inpumkhat tawh zawk mai dawn a lo ni.##

Tunlai Thil awmzia chi 9

1.  Hmangaihna a dai zo ta em ni?>> Midangte ka hmangaih tiin kan ka chuan sawi ve thin mah ila, kan nun hian midangte kan hmangaih loh zia a ti chiang,hmangaihtu kan nih si chuan mite sawisel mai loin mite nun siam that chu kan tum tur a ni lo vem ni? Sawisel hrep hnua siam that leh ai chuan sawisel lova siamthat chu a rilin a hlu zawk fe si a.

2.  Kohhran kawra hmangtute kan pung zel>> Kohhran dik tak chu kei mahni hi kan ni a, heng building hi chu kan hmuhkhawmna tura ruat mai a ni,tuna in biakin kha in inkhawmna turahin hman mai a ni a, khatah chauh khan Pathian a awm tihna a ni lo, Pathian chu keimahni chhungah Thlarauin englai pawhin min awmpuiin min chenchilh fo thin. Biakinah chauh Pathian a awm tia ngai thintu i nih chuan Biakinah i nun i uluk anga, pawn lam nun erawh i ngai pawimawh ngai lovang.Mahse Ringtute kan awmna a piang hi Biakin dik tak chu a ni.

3.  Midangte kawng tha zawh tur dangtute kan tam >> Nun chhungril taka Pathian hmangaihna nei si lovin, Pawlah hian kan rilru kan nghat a, Pathian ai pawhin pawl zawk hi kan hmangaih a, Mi pakhat piantharna a lo chan avanga lawmpuitute aiin mi pakhat kan pawla a lo inkhawm avangin kan lawm zawk thin. Kan member te zing atang pawl dangah va inkhawm an awmin kan khap a, mahse an mamawh chaw tha kan fah leh thei si lo.Chuvangin Mahni lalpa tih taka awm tum si lovin, Lalpa tihtu tur an lo awm pawhin kan dang thin a nih hi!Mahni van ram kawng zawh tum si lovin, mi dang zawh tur pawh kan dang ta a nih hi! Hei hi Lalpa huat zawng tak a ni sin, action chu i chungah a la leh ngei dawn a ni tih hi hre reng ang che.

4.  Thuhriltu der >> Heng zawlnei derte leh thuhriltu der te hi nakin huna lo thleng turah dah suh ang che.Tunah hian a thleng mek a, a la thleng zel bawl ang. Nuna chanfiahna nei si lovin, kan thluak hriatna vel mai mai hian sermon kan ziak a, kan sawi duah mai thin, mahse chu kan thu sawi ngei chu keimahni pawhin kan zawm si lo,kan thu sawi atang mi piangthar pawh lo awm se, kei mah ni ang bawk, sawi thei viau si, nunpui leh si lo tho a lo chhuak leh thin, Theipui kungah chuan theipui rah vek an lo thin ang hian.

5.  Sakawlh >> Sakawlh hi thil danglam taka lo awm turah mitinte hian kan ngai tlangpui a, mahse keimahni ngei chu sakawlh chu kan ni thei tlat si. Kohhrana nih leh thut thleng tha kan chan theih nan, pawn lamah chuan fel hmel takin kan awm a, mahse mite hmuh phak lohah chuan kan nung duhdah leh viau si.Mite mit ti del tu mai kan ni.Nangmah kha in enfiah la, hruaitu ni tura thlak lo nia i in hriat chuan in hnukdawk vat ang che.A chhan chu i thiltih rah chu nang mah ngeiin i la seng dawn si a, a ruka i thiltih thinte kha Pathian hmaah chuan fiah takin a lang a, a thlir reng thin che a sin.Chu mai a la ni lo, rorelna niah chuan i chanchin chu i la sawi ve ngei dawn a ni.

6.  Juda Isakriota >> Lal Isua man tira, hralh tu a ni a, mi sual tak a ni. Mahse, a ni aipawha sual zawk hi kan tam ta hle mai. Juda Isakriota chuan vawi khat chauh Isua a hralh a, kei ni chuan vawi chhiar sen loh kan hralh ta a nih hi.Nitinin kan hralh a, kan phatsan a, kan hralh nawn leh fo thin. Pathian thinlung chu engtiang takin na ang maw!

7.  Khawngaihna kal sual puitute >> Pathian chu khawngaihna ngah tak a ni tih chu kan hria a, mahse chu a khawngaihna chu kan changfiah lo tlat thin. A khawngiahna changfiahtute chuan mahni an in hmu lian ngai lova, engmah ti thei lo kan nih zia kan inhria a, Lalpa lo chu innghahna tlak a awm loh zia kan hmu chianga, kan sualna ngaiah chuan kan sual nawn tawh thin lo.Mahni fel viau leh tha bik viau a, kan in hmuh thinna hian Pathian hmel kan hliah a, kan nunah Lalpa a ropui thei thin lo, miten kan nunah Lalpa hmel an hmu thei thin lo. Khawngaihtu khawngaihnaah hian han chiang mai teh la, nitinina i sawi tur chu kei hi tunge maw ka nih a, heti em a, mi lo hmangaih le? tiin mahni awm in chumin lalpaah lawmthu i sawi fo thin ngei ang le!

8.  Nihna vang chauha Pathian beltute >> Nihna vang chauha Pathian beltute chuan Pathian hmangaihna an hre thiam ngai lo va, Mahni ropui nan engkim an ti thin.Tin an lawmman chu an hmu zo tawh a, vanah rochan an nei lovang. Mihringte zahawma min siamtu chu Pathian thu hi a ni a, mahse Pathian thu avanga mite hmuh sang chawp mai kan nih kan in hre lo va, Lalpa phatsanin nihna rawng zawk chu kan bawl thin.Mahse chung mite chuan rei an rial lovang.Kel leh Beramte chu hlirin an awm thuai dawn si a.

9.  Insansiakna >> Pathian thute hi hre ber nih kan tum a, mahse changfiah tu nih erawh kan tum leh lawi si lo. Hre ber nih chu thil harsa teh lua a ni lo, mite kara va sawi duah kha a ni mai.Mahse changfiahtu nih chu thil awlai a ni lo, Hapta khat chaw nghei a, tawngtaite a ngai thin a, tawngtai tleivar te pawh a ngai thin, mahse chungchu kan peih leh lawi si lo.Ringtu nun hi a nuam zawng hlira zawh kan tum a, mahse kan kawngzawh mek erawh kawngka zau zawk a ni tih reng kan hre si lo.Pathian thu chu hre tak tak ni la chuan mite kara va in sawi theih lam a ni loh zia i hria ang a, engmah i nih loh zia i in hria ang a, khawngaihna vanga nung leh che ve mai i nih zia in in hria ang a, nungdama i la awm a vang chauh pawh khan lawmthu sawi i bang thei lo ngei dawn si a. Pathian thu hi hre ber nih kan tum luatah hre zo lovin, a zatve kan hria a, huaisen takin kan sawi ve par par mai thinte hi kan in enfiah deuh chu a ngai a ni.###

Tunge ka nih ???

             Nitinin he thu hmang hian kan inzawh nawn fo a ngai thin.A chhan leh vang chu setana hian second tin hian min beih a chawl ve ngai loh vang hian, min bei a, kan rilrute lak penga thil tha lo lama min hruai luh hi a thil tum lian ber a nih thin vang hian, he thu hmang hian nitinin in zawh nawn fo kan ngai thin a ni.

Kei hi Lei leh Van lal berin a fapa thisena lei ka nih tawh si chuan chu min tlan rawngbawltu tur chu ka ni a, mahse eng thil tlaktlai lote nge maw ka lo tih thin le? Ka rilru sual lamah awnin thlem tlukin ka awm a, Lalpa hming ka lo ti chhe fo thin a lo ni.Mi ngaidam rawh Lalpa tih vawi engzat lai nge ka sawi ngai dawn le?Lalpa chuan vawi khat a ngaidam che a, chu chu chatuan hlawlh tlang a ni tlat mai sin.Chatuan atan vawi khat a thi a, a thi leh tawh dawn si lo.A chhan chu a vawi khat thih chu kan sual tlenfainan a tawk hle si a.

              Nitinin mitinten kan hun hlu tak kan hmang theuh a, kan hman dan erawh a inang lo hle thin.Hun hmang theuh theuhah mi fing leh fing hun hmang dan a inang hek lo.Kan Biblein mifing tia a sawi thinte reng reng chu khawvel finna zira fingte hi an ni lo va, Lalpa Pathian thlirna eng atang chuan mifingte chu A chanchin tha thu nitin zantin ngaihtuah chhut neuh neuhtute hi an ni tlat.Khawvel sual zawng zawng phura tlengfaitu hnung zuia,hrehawm leh nuam pawh a rinawm a, ama rawng chauh bawl zel hi kan tih makmawh a ni tih hriatna hian mihring min ti fing ta phawt a,mahse chumaiah chuan kan tawp tur erawh a ni lo thung.Hmalam pana hmun thim laite tieng tuah min ruat a, ram thim ti engturin a hniakhnung zui a, a hming avanga thil mak tam takte ti a, rinawm turin min ko reng thin.

             Rawngbawl hna hi kan tih makmawh a ni a, kan bawl avanga thil tha ti riaua inhriatna hi setana bumna a ni a, chu chuan nitin min eiral thin.Mahse lawm taka Lalpa rawngbawl a, a hniakhnung zuitute tan lawmman ropui,a tlukpui reng khawvelah hian a awm si lo; chu lawmman chu kan tan dah that kiauin a awm thung.Engtiang thiltha pawh ti mah la, Lalpa hmaah chuan eng tham mah a ni lo, Fa tam tak a nei lo va, a neih chhun ngei min petu lakah chuan ka thiltha tih ve te hi a lo nep thin em zawk a ni.Mahni thil tih thatte chhuang lo va, Lalpaah lawma a hnung zui mai tur ka nih zia hi nitin ka inhre chhuak fo thin .

            Mahni inhriat chianna hian chan tawka lungawi thiamnaah min hruai lut a, kan nihna leh mawhphurhnate pawh huaisen taka ti thei turin chakna min pe fo thin.Mahni in hriat chian tluk a hlu reng a awm loh vangin,midangte hriat chian i tum thinna kha dah bo la, nangmah zawk kha inhriat chian tum thin ang che.###

Mawhphurhna kan nei

Thufingte 24:11-12 Thi tûra hruaite chu chhan chhuak la. Thah mai tûrte chu chhan chhuak thuai rawh."Ngai teh hei chu ka hre lo" i tih mai chuan, Thinlung buktu chuan a ngaihtuah dawn lawm ni? I nunna vawngtu chuan a hre dawn lawm ni? Mi tin, an thiltih ang zelin a rul dawn lawm ni?

           A hmasa bera kan hriat atana pawimawh em em chu rawngbawl hna hi mitinte kan mawhphurhna a ni a, kan chak changa thawk a, peih loh chang thawk leh lo mai mai theih a ni lo.Mi zawng zawng kovah Lalpan a dah a, kei ka tel lo tiin mahni in hnem nan hmang ve thin mah la, i tih tur dik tak a ni tih hi hriat a pawimawh hle.

            Pathianin Israel fate hruai turin Mosia a ko a, mahse a mah mai chuan engmah a nih loh zia a in hria a, a pha ngei a nih kha.Pathianin a mah pui turin Arona a pe ang khan,khawvel mi tam tak zingah hian Pathianin Pastor tur,Evan tur,Missionary tur a a koh bikte an awm a, heng hnate hi chu mahni phurna ngawta thawh chi pawh a ni lem lo.Mahni phurna maia thawk kan nih chuan beidawngin kan hawikir leh mai thin.Mahse Lalpan a kohte chu hrehawm hle mahse an tuar hram hram a, beidawng hle chang tam mahse amah Pathian vekin a tanpuia a ti chak fo thin.Chung mite chu Pathianin thil pakhat khat ti tura a koh bikte chu an ni.

             Kohna dawng ve lote rawng kan bawl ve dawn lo tihna em ni? Ni lo ve, kan bawl zawk zawk tur a ni.Mosia chu hruaitu a ni a, Arona chu a tanpuitu tur a ni.Tin, Mipuite awm lo se chuan Mosia khan hruaitu atan thlang kher a ngai lo bawk.Lalpan min dahna hmun theuh a nei a, chu min dahna hmun chu hria a, lawma a hnung zuitute hi khawvela mi vannei, mi hlim kan tih thinte an ni mai a ni.Min dahna hmunah lungawi lo va, a ai changkang deuh zawka kan ngaih Pastor hnate hi phurna ngawt i thawh chuan phur leh lohna vangin i beidawng leh mai dawn avangin, Lalpan a dahna hmun che hria a, inngaitlawm tak chunga a hniakhnung zui turin min duh a ni.

             Pathian thu hi sawi duah lam a ni lo va, kan nundan hian miteah hna a thawk nasat zawk vangin, ram thim ram rova kal tura kohte kan nih loh pawhin mahni awmna hmun hmunah rinawm taka thawka a hming timawi turin min ko.Chumiah chuan ringlote pawhin kan nun an hmuh an awt a, kan Pathian an lo chawimawi a, an zingah Pathian ropui bera chu chawi a lo nih theihna turin a ni.

             Mitinten kan mawhphurhna chu kan chiang tawh hlein ka ring.A tawp ber atan, tuna i awmna hmunah khan Lal rawng chu i bawl mek a ni tih kha inhria la, i nun uluk ang che. Miten an thlir reng che a,i hmelah krista hmel hmuh an chak fo thin.Mahni tana nung tawh lova, thia tho leh-a tan nung tawh zawkin,midangte tanpui a, rethei pachhiate leh hmeithaite kan fo hi a lawm zawng a ni, chu chu hria la Lalpa rama tana bei tur hian mikhual i ni lo va, Mi zawng zawng mawhphurhna hna ropui leh thupuk ropui ber a nih tih hi i lo hre reng dawn nia.Engkim kan tih apiangah chawimawina zawng zawng chu Pathianin nei se la, kei ni pawh chumiah chuan chawimawiin kan awm ve thei ang.Lalpan a tharin malsawm che rawh se!!!